តារា​សម្តែង អ៊ឹង និមល បើករថយន្ត​បុក​ឡាន​ចត​ស្ងៀម ​និង​របង​ផ្ទះ​គេ​ទាំង​កណ្តាលអធ្រាត្រ​

98

ភ្នំពេញ​ ៖​ តារា​សម្តែង​ស្រី​កញ្ញា អ៊ឹង និមល ដែល​ត្រូវជា​ប្អូនស្រី​បង្កើត​របស់លោក អ៊ឹង រដ្ឋា ហៅ​នាយ ទុយ បាន​បើក​រថយន្ត​មួយគ្រឿង​ពាក់​ស្លាក់​លេខ​ភ្នំពេញ​2AM-83 95​ទៅបុក​ជាមួយ​ឡាន​ចត​នៅ​ស្ងៀម ​និង​របង​ផ្ទះ​របស់​អ្នកជិតខាង​ស្ថិតនៅ​ម្តុំ​បូរី លឹម ឈាង​ហាក់ កាលពី​វេលា​ម៉ោង​ប្រមាណ​១២​អធ្រាត្រ​ថ្ងៃទី​២៧​ខែសីហា ឆ្នាំ​២០១៩។

យោងតាម​ម្ចាស់ Account Facebook​ឈ្មោះ Mey titthara បាន​រៀបរាប់​ឲ្យ​ដឹងថា​ កាលពី​វេលា​ម៉ោង​ប្រមាណ​ជាង​១២​កណ្តាល​អធ្រាត្រ​យប់មិញ​ស្រាប់តែ​ឮ​សំឡេង​លាន់​ប្រាវ​ដូច​រន្ទះ។ រថយន្ត​របស់​អ្នកជិតខាង​ជាប់​ផ្ទះ​ខ្ញុំ បាន​ខ្ទាត​មក​បុក​របង​ផ្ទះ​ខ្ញុំ​បណ្តាលអោយ​បាក់​របង​រៀប​ផ្ទាល់​ដី​ចំណែក​រថយន្ត​បង្ករ​ម៉ាក​ហាយ​លែ​ន​ដឺ​ត្រូវបាន​ផ្ទុះ​ពោង​សុវត្ថិភាព​ជាប់គាំង​ទៅមុខ​លែងរួច។

ប្រភព​បាន​បន្តថា ​ហេតុការណ៍​នេះ​បង្ក​ឡើង​ដោយ​កញ្ញា អ៊ឹង និមល ដែលជា​រា​តា​សម្តែង ត្រូវជា​ប្អូនស្រី​បង្កើត​របស់លោក អ៊ឹង រដ្ឋា​ហៅ ទុយ​។​ បន្ទាប់ពី​កើតហេតុ​រួច​នាង​បាន​តេ​ទូរស័ព្ទ​ហៅ​សាច់ ញាតិ​រួមទាំង​នាយ ទុយ ជា​បងប្រុស​ដែលមាន​ផ្ទះ​ក្បែរ​នេះដែរ (​ផ្ទះ​លេខ​61B ក្នុង​បុរី​លឹម ឈាង​ហាក់​) មក​ដោះស្រាយ​គ្នា​ជាមួយ​ភាគី​ ដែល​រង​ការខូចខាត​ទ្រព្យសម្បត្តិ​។ ​រហូតមកដល់​ម៉ោង​១១​ថ្ងៃនេះ​(២៨ សីហា​)​រថយន្ត​នៅ​ជាប់​គាំង​ខាង​មុខ​ផ្ទះ​នៅឡើយ ដែល​ជា​ហេតុ​មិន​អាច​ចេញចូល​បាន។

ម្ចាស់​Account Facebook នោះបាន​បញ្ជាក់ថា​ លោក​បាន​សួរ​ទៅ​នាយ ទុយ នៅ​យប់​កើតហេតុ​ថា​លោក​តើ​របង​ផ្ទះ​បាក់​គិត​យ៉ាងម៉េច?​ អ្វី​ដែល​លោក ទុយ ឆ្លើយ​គឺ ម៉េច​ចេញថ្លៃ​ជួសជុល​ឡាន​ហើយ​ចង់​ឲ្យ​ធ្វើ​របង​ទៀតហើយ​លោក​មាន​លុយ​មក​ពីណា​។​ ឆ្លើយតប​នឹង​ការ​លើកឡើង​នេះ​អ្នកនាង អ៊ឹង និមល បាន​បញ្ជាក់​វិញ​ថា ​មាន​ស្ដាប់​ហេតុផល​ពី​ភាគី​ខ្ញុំ​ទេ​ខ្ញុំ​ទាក់ទង​ឡានស្ទូច​តាំងពី​ព្រឹក​ម៉ោង​៧​ព្រឹក​តែ​គេ​ចេះតែ​អោយ​ខ្ញុំ​ចាំៗ​ អាច​ទៅ​សួរ​នៅ​កា​រ៉ា​ស់​ឡាន​ម៉ូ​លី​នៅមុខ​បុរី​ហ្នឹង​បាន​ថា​ខ្ញុំ​មាន​ទៅទាក់ទង​រឿង​រក​ឡានស្ទូច​ហ្នឹង​ទេ​?។

រឿង​អ្វី​យក​លេខ​ផ្ទះ​ខ្ញុំ​ទៅ​ផុស​ជា​សាធារណៈ​មនុស្ស​យើង​អាច​និយាយ​គ្នា​បាន​មិនមែន​ចេះតែ​យកទៅ​ផុស​ផ្តេសផ្តាស​បើ​មករក​ខ្ញុំ​នៅផ្ទះ​ខ្ញុំ​មិន​ដោះស្រាយ​ជូន​ខ្ញុំ​មិន​ថា​ទេ​តែ​នេះ​មិន​មក​សួរ​ហេតុផល​អ្វី​សូម្បី​មួយ​ម៉ាត់ ធ្វើ​នេះ​មិន​លើស​ទេ​អី​ឬ​គិតថា​ខ្លួន​ជា​អ្នកកាសែត​អាចធ្វើ​អ្វី​ក៏បាន​តាម​អំពើរ​ចិត្ត​។​នេះ​ជាស​ម្តី​របស់​អ្នកនាង អ៊ឹង និមល បន្ថែម៕